مصر ذات الحدود
كتبهاFreedom ، في 19 ديسمبر 2007 الساعة: 21:16 م
مصر ذات الحدود .. من اول ما فتحت عيني على دنيا السياسة ومشكلتي مع الوطن ان كله حاجه فيه ليها حدود وحدود للاسف ضيقة قوي وخنقة قوي .. للحرية في مصر حدود بيرسمها اللي في ايديهم صنع الحدود .. وعندنا الحرية محبوسة في قفص ومكسورة جناحاتها من باب الاحتياط .. للنزاهة في مصر حدود .. ممكن تكون نزيه بس لازم تحاسب وما تمسش حد مهم بنزاهتك .. للصراحه في مصر حدود .. كل حاجه حلوة في مصر ليها حدود حتى البسمة عالشفايف الحرة ليها حدود واضيق حدود لانها بسرعه البرق بتختفي ويخنقها القهر والفقر .. واتمنى يكون للصبر حدود .. والمواطن المصري مرة من نفسه يقول لا لا لا .. ويبطل صبر الحمير عالحمل التقيل .. طبعا الحمل معروف وتقيل تقيل قوي .. حتى الحب فيك يا وطني بحدود .. لانه مقتول في القلوب .. والجاني حر طليق بينام على ريش النعام وبياكل كافيار .. وسايب المواطن بين براثن الفقر .. ويقولك الحب بلا حدود .. زمان ايام ما كنت لسه فيا نفس للشعر .. كنت بقول .. ثم تقولين عن الهوى وتنظرين مني انطق ـــ يا حلوتي مات الهوى في اعين ذاك الوطن الخانق .. حتى حبك انت يا وطني ليه حدود … يعني احبك اه لكن اكون ايجابي لا .. هو العمر بعزقة .. ده طبعا صوت اي مواطن مطحون .. اعتقد ان اللي بيرسمه الحدود دي ناجحين قوي قوي في حبكها عالاخر عالمواطن عشان يفضل على حاله طول العمر ..
ولكن احقاقا للحق .. وعشان اكون صادق وما بكدبش .. فيه حاجات في مصر مالهاش حدود … القهر بلا حدود .. والذل بلا حدود .. والفقر والصمت والسلبية كلها بلا حدود .. بس اهم حاجه بلا حدود في مصر هي ايه ؟؟ .. طبعا كلكم عارفين .. الكووووووووووووسة .. الكوسة اللي لو النيل صلصة مش هيقضيها طبيخ .. والكوسة مشكلتها الكبيرة .. ان الصلصة للاسف في مصر بحدود .. فبالتالي مش عارفين يطبخوها وكرد فعل منطقي جدا بقوا بيوزعوها عالمصالح الحكومية والمناصب العليا حتى عالناس في الشارع .. في كل مكان تلاقي كوسة .. لا لا كوسة مين تلاقي طن كوسة عالاقل ..لا والله حكومة كريمة .. عالاقل بتدي المواطن كوسة ببلاش .. وكل واحد يحاسب وهو ماشي ليعتر في حته كوسة كده ولا كده .. ولا يدوس على خط الحدود المرسوم بالطباشير لكل واحد فينا .. وتصبحوا على خير قصدي تصبحوا على كوسة ..
ـــــــــــــــــــــــــــــــــــــــــــــــــــــــــ
التصنيفات : سياسة وأخبار, كتابات ساخرة | السمات:كتابات ساخرة, سياسة وأخبار
أرسل الإدراج | دوّن الإدراج
