اكتب لها ايه يا قلم وايه اقول
ده حبها ساكن بقلبي ما يزول
اكتب لها واللقا بينا قليل
ليل الاسى في بعدها دايما يطول

عابر بحورك يا هوى تايه حزين
فين حبها ده يا هوى يشفي الانين
فين سحرها في غربتي فين العيون
فين القمر اللي يزور ليل عاشقين

فين فجرها غايب وبقاله سنين
فين ضحكها تايه ودمعها الحزين
دي ذكرياتي حلوها ومرها
دايما تلاقي رسمها عالجبين

ليه القدر يحكم علينا باشتياق
والذكريات تروح ويبقالنا الفراق
والحزن يدور بينا في سواقي الحياة
فين الونس غير الدموع طول المساء

آه لو تعود أيام لقانا من جديد
نرسم على مر الحياة عالم سعيد
يرجع هوانا للطريق وليه نعود
نكسر سوا شوكة الزمن وان كان عنيد

يلا حبيبتي ليه نعيش دنيا الألام
يلا سوا ننسى الزعل ونقول سلام
بينا حبيبتي ذكريات مش تتنسي
دي الذكريات اكبر كتير من أي كلام